لازم نكون فرعونيون؟؟؟؟

امبارح كنت راكب باص وراجع من القاهرة وهبا مرة واحدة افتتحت جلسة نقاش في الباص حول موضوع فساد وخراب وبوظان التعليم في مصر وان السبب الاساسي على رايهم هو ان وزير التعليم لغى الضرب او منع الضرب في المدارس والولد لازم ينضرب عشان يتربى
طيب انا عايز افهم حاجة هو احنا لازم نربي في الطفل ثقافة ما تعملش حاجة الا بالكرباج ولازم تكون فرعوني عشان اللي تحتك ينظبتوا
هو الطفل داخل يتعلم في سجن حربي ولا داخل يتعلم فين؟
هو انا كمدرس لازم انتقم من الطفل
لازم اربي على القهر والارهاب وانظبط والا ولازم اعرفه ان الله حق ووووو
لازم يكون عندي جيل كامل مالوش وازع من جواه يحركوا ما فيش غير الكرباج
ليه ماعلموش اتحرك من جواك
ماهو لما نيجي نبص هنلاقي الطفل اول اماالعصاية تتكسر اتقلب 180 درجة طب ليه
لما اضرب الولد عشان بيشرب سجاير من غير ما اتحاور معاه اول ما ابعد عن نظره هيشربها لكن لو ربيته بالعقل على انه ما يشربش السجاير لو اترمى في مصنع سجاير مش هيشرب خالص
الرسول صلى الله عليه وسلم عمره ما استخدم الكرباج او غيره عشان يربي ويعلم الصحابة مش الصحابه بردة رضوان الله عليهم اتخرجوا من مدرسة المصطفى صلى الله عليه وسلم
طيب هو الرسول عليه الصلاة والسلام كان ماسكلهم عصاية حاشاك يا حبيبي يا رسول الله
طيب ليه احنا مانتعلمش منه
ليه ما العبش انا مع الطفل كورة وانا بلعب معاه ما خليهوش يشتم خالص ووانا بلعب معاه اقرن حاجة من الدراسة باللعبة صدقوني مش هينسى نهائي المعلومة دي
ليه المدرس ما يتحولش الى صديق الطالب مش الطالب ده تلاقيه على طول بيسمع كلام صديقه طيب ما يتحول المدرس الى صديق مش لازم يكون غول عشان يثبت انه مدرس
كام مرة يا جماعة بنسمع واجد بيقول الاستاذ فلان ربنا يكرمه خالاني اصلي انا ما كنتش بصلي خالص وصليت (حبا ) في الاستاذ ده
وواحد تاني بيقول ابني كره مادة الرياضيات عشان مدرس المادة كان منتدب من السجن الحربي وكان بيطلع عين الاطفال فابني كره المادة بسببه ربنا ينتقم منه
وواحد تاني يقول ابني عبقري العالم في كذا دخلها عشان حب استاذ الماده فدخل النقطة دي عشان خاطره
ليه ما نفكرش في اتعليم بالممارسة والتعليم بالحب والرحمة
ليه مانربيش ولادنا على انهم يتحركوا من جواهم مش عشان حد
نعلمهم يحبوا بعض ويرحموا بعض
كفاية بلدنا الغاليه مش محتاجه فرعونينون تاني

كلام جميل :

أحي أقول ان المدرسة اللي كنت شغالة فيها , هناك منعين الضرب و الشخط الجامد و الحاجات دي, و انا الطبيعي اني مكنتش ناوية استخدمها اصلا.

اللي حصل ان انا عملت زي ما انت قلت بالظبط و كنت صديقة للطلاب هناك و كنت بحبهم جدا and so were they. و لكن مع مرور الوقت خدنا علي بعض زيادة عن اللزوم و السيطرة عليهم بدأت تقل و تقل ووصلت لدرجة اني مبقتش عارفة اسيطر عليهم.

الحل من وجهة نظري اننا نجمع بين الاثنين:
اقصد ان داخل الفصل المعلم يكون قوي الطباع شوية و مش لازم يضرب بس يكون متحكم في الفصل و مش هقول ميكونش صديق داخل الفصل بس ميأخدش الطلبة عليه اوي و هو في الفصل.
انما بره الفصل, يكون صديق و اب و اخ و كل اللي عايزه و يتعامل مع الطلبة بالطريقة اللي يحببهم فيه بيها.

في البداية يا ادمن انا بشكرك جدا عى مرورك الكريم
لكن
انا مش قصدي ان اكون معاهم سلس لابد او ان انا ازيل الحدود بينا لكن ما يبقاش الاساس الضرب والقهر وكدة
شوية كدة وشوية كدة صج
يعني لازم يكون في شوية حمشنة وشوية حنان
قصدي التعامل يكون من مبدا ان الولد دة او الطالب ده اخوي الصغير
هخاف عليه وهاحمية لكن لو غلط هاقومه وعدله بأي اسلوب كان