من بعد حبس السنين
وبعد فَقد الحنين
وبعد موت المشاعر
سببه البعاد عن مساكن
كانت تاخدنا ساتر
من كل عين غدّارين
*****
لمّا شِباكَك غطّت
وروحي بالعجز حطّت
والطبّة كانت نهايتي
ما فضليش غير جنون !
- تقدر تقول إمتى كان ؟
ما أقدرش أحدد لك زمان
لأنه كان من زمان !!
[ فاكر ملامح أماني
حِلمها قلبي الفاني
في كل لحظة تداني
جمعت ما بين قلبين
فاكر حاجات مسحورة
وحركة كانت جسورة
بِقيت حاجات مكسورة
من اعتياد السكون ]
- تقدر تقول إمتى كان ؟
ما أقدرش أحدد لك زمان
لأنه كان من زمان !!
*****
ألقاك في يوم محزون
بين البشر مسجون
تصرخ في وسط الكون
والكل مش سامعين
تعرف بإنك إني
نفس السكون عايشين
يصعب عليك اكمني
بين الحديد مسجون
تجري بدون تفكير
تكسر حديد قضبان
تطلق سراح طيرك
طيرك ما يرضى يطير
خايف يقع ليموت
كتر البعاد خلاه
ينسى إن له جناحين !!
الرئيسية 
الأحد فبراير 25, 2007 10:35 pm